利物浦復操眾星黯然　迪亞斯商討去留

利物浦因迪亞高祖達突然離世，新球季開操推遲到周二(8日)展開，多位球星揸車返訓練基地嗰陣神情哀傷，周日(13日)對普雷斯頓嘅首場季前熱身賽，仍未決定係咪如期舉行。近期備受爭議嘅哥倫比亞球星路易斯迪亞斯，就自爆正同球會商討去留問題。

利物浦球員周二復操，第1日只係做體能、身體測試，同埋留喺健身室郁下，更重要嘅係視察球員嘅情緒同心態，睇下係咪適合踢波，因為周日就有場對普雷斯頓嘅熱身賽，呢場波已安排英國電視台直播，但仍未知道係咪會如期舉行。

至於喺祖達喪禮當日，喺社交網公開自己去開P跳舞影片嘅迪亞斯，盛傳獲巴塞隆拿斟介，呢位翼鋒日前接受哥倫比亞網紅Mauricio Gomez訪問，承認同球會傾緊去留：「我哋同球會商討緊，睇下最後會達成咩協議，會盡力做出對大家最好嘅決定。洽談係進行中，同利物浦以及其他斟介球會，我心情好平靜，喺利物浦亦好開心，只係盡力做出最好決定。」