曼聯想簽「免費品」　3大土炮射手全都要？

曼聯收購賓福特射手麥比奧莫遇阻，近期計劃向自由身前鋒埋手，繼睇中卡維特利雲之後，現時又想簽入占美華迪、哥林威爾遜，打造一條「土炮」鋒線。

曼聯簽入狼隊射手馬菲奧斯根夏後，仍要繼續「增鋒」，但賓福特將麥比奧莫標價為6,500萬鎊(約6.9億港元)，令紅魔鬼卻步，加上另1位目標人物約基利斯好可能加盟阿仙奴，曼聯惟有改變策略，斟自由身球員，除咗早前爆出想簽入約滿離開愛華頓嘅卡維特利雲之外，亦有興趣招攬占美華迪、哥林威爾遜。

占美華迪今夏離開李斯特城後，獲得唔少海外球會垂青，但仍未有下文，好大原因係呢位38歲老將想繼續踢英超，如果曼聯出手簽佢，相信華迪好大機會答應。

至於哥林威爾遜亦約滿離開紐卡素，呢位33歲前鋒上季上陣22場僅入1球，水準今非昔比，即使成「魔」，但能否提升曼聯攻力，實屬疑問。