不打不相識？熱刺將簽入扭波王古度斯

熱刺快將簽入「扭波王」。據轉會專家羅曼諾爆料，熱刺出價5,500萬鎊收購韋斯咸翼鋒古度斯，並簽約6年，查實佢上季同好多熱刺球員有牙齒印，依家要佢哋化敵為友，真係考起新帥法蘭克。

古度斯於2年前加盟韋斯咸，上季於英超有195次扭過對手，位居榜首，因此獲得車仔、紐卡素、熱刺等垂青，但呢位24歲加納翼鋒只想加盟熱刺，經過日前報價5,000萬鎊被拒後，決定加碼到5,500萬鎊終於成事。

不過古度斯未必受到熱刺隊友歡迎，因為上季韋斯咸作客熱刺之役，古度斯喺末段先後同雲迪雲、李察利臣及柏比沙亞發生衝突，更出手打雲迪雲塊面，最終做埋「紅牌阿姑」，非常冇品，依家佢哋就嚟要做隊友，睇嚟新帥法蘭克要先協調大家關係。