辛祖祖記疑夾計老屈曼聯　涉款1億元

祖雲達斯向曼聯斟介查頓辛祖陷入膠着狀態，主要係轉會費傾唔掂，據報曼聯要求轉會費為2,500萬鎊(約2.66億港元)，祖記只肯畀1,500萬鎊(約1.6億港元)，當中1,000萬鎊差額(約1.06億港元)，剛好就係辛祖1年人工，懷疑係祖記同辛祖夾計壓價，老屈曼聯。

意大利傳媒報道，祖記將辛祖轉會費壓至1,500萬鎊，並非巧合，懷疑祖記在斟介過程中獲得辛祖經理人「通水」，因為辛祖同曼聯尚餘1年合約，年薪1,000萬鎊，曼聯如果無法出售辛祖，就要向辛祖支付1,000萬鎊薪金至約滿，屬於既定開支，祖記希望利用曼聯這1,000萬鎊既定開支，來補貼佢哋收購辛祖嘅轉會費支出。

辛祖並非曼聯新球季計劃一部份，今夏勢必出售，祖記睇死曼聯搵唔到新買家，而辛祖同曼聯關係甚差，因此先出現祖記同辛祖聯手老屈曼聯嘅戲碼，至於最後點收科，仲要睇事態發展。