阿仙奴瘋狂掃貨　訪港前再斥2億鎊簽4星

即將進行亞洲之旅嘅阿仙奴，近日轉會市場瘋狂掃貨，周四(10日)宣布丹麥中場基斯甸洛加特由賓福特加盟，成為今夏第3簽。報道指阿仙奴決意喺下周六出發亞洲前完成所有收購計劃，未來1周再簽約基利斯、馬度基、伊比爾治伊斯同基斯甸摩斯基拿，轉會費超過2億鎊！

阿仙奴今夏已簽入門將阿列沙巴拿加同中場蘇比文迪，洛加特周四以1,200萬鎊加盟成為第3簽，簽2+1年合約並會着16號。洛加特表示：「我有少少激動，因為喺依家嘅年紀(31歲)實現到細個踢歐聯嘅心願，原本以為冇機會，依家我都可以現場聽歐聯嘅主題曲。」

周四正式開操嘅阿仙奴，周五已拉隊飛去西班牙進行小集訓，19號就會啟動亞洲之旅，先飛新加坡對AC米蘭同紐卡素，再到香港同熱刺喺啟德交鋒。據報領隊阿迪達希望喺出發前，實現季前大部份收購計劃，包括簽多3名攻擊手同1名中堅。

率先加盟嘅會係英格蘭國腳翼鋒馬度基，同埋士砵亭前鋒約基利斯，權威記者羅曼諾證實，阿仙奴已收購車路士嘅馬度基已經「Here We Go」(落實)，轉會費連獎金條款總值5,200萬鎊，另外同士砵亭斟介約基利斯，亦已接近7,000萬鎊共識。

除此之外，阿仙奴仲想收購水晶宮中場伊比爾治伊斯，佢合約內有6,800萬鎊買斷條款，而且可以分3期支付，對今年財務預算影響唔算太大，有望實行。最後阿仙奴正同華倫西亞斟洽西班牙中堅摩斯基拿，呢位小將已拒絕球會續約，決意1,500萬鎊轉會阿仙奴。