根夏夢想着曼聯10號　達洛治轉號碼地位提升

曼聯已為新球季復操，依家人員變動唔算太大，不過球衣號碼就先「執位」，新加盟嘅馬菲奧斯根夏日前落實着10號波衫，佢受訪表示做「紅魔」10號係佢細個夢想。另外，葡萄牙守將達洛治亦會轉號碼，證明地位提升。

根夏接受曼聯官方訪問，大談10號對佢嘅意義：「着曼聯10號係我嘅夢想，見到件衫我就諗起朗尼，我細個就係睇佢踢波，仲有雲尼斯達萊、伊巴謙莫域等等，我仲曾經同拉舒福特交換波衫，佢件10號仲喺我屋企！能夠着曼聯波衫，每個號碼都係榮幸，但10號感覺最特別，嗰份責任感令我更想用入波、助攻去幫助球隊。」根夏新一季着10號，正正就係搶走拉舒福特嘅號碼。

另外，葡萄牙球星達洛治加盟曼聯7年都係着20號，但隨住域陀連迪路夫離隊，呢位26歲球星新一季會改着2號。曼聯歷來最強2號非加利尼維利莫屬，前曼聯領隊摩連奴曾經指達洛治係「新加利仔」，依家達洛治正式繼承呢個重要號碼，亦意味佢喺隊中地位穩如泰山。