皇馬簽「帶刀侍衞」　曼聯都有錢分

西甲豪門皇家馬德里喺世冠盃4強出局後，加快增兵行動，根據「轉會權威」記者羅曼諾(Fabrizio Romano)爆料，「銀河艦隊」已經同意以5,000萬歐元(約4.6億港元)收購賓菲加左後衞艾華路費南迪斯，呢位22歲西班牙新星前度效力球會曼聯，亦可以分到1,000萬歐元(約9,200萬港元)。

艾華路費南迪斯上年1月以先借後買方式，由曼聯轉投賓菲加之後，有出色表現，包括上季52次披甲，射入4球及5次助攻，踢法充滿侵略性，屬於典型「帶刀侍衞」。

賓菲加上年夏天以600萬歐元買斷艾華路費南迪斯，換言之，僅1年時間身價暴升近10倍。由於曼聯放棄回購權，賓菲加可以直接出售艾華路費南迪斯畀皇馬，但紅魔鬼仍然可以獲得當中20%轉會費，如果艾華路費南迪斯最終以5,000萬歐元成交，曼聯就有1,000萬歐元收入。

艾華路費南迪斯曾於2017至20年喺皇馬青年軍受訓，其後轉投曼聯，佢今次可以話係「衣錦榮歸」再次上「艦」。