下一位麥巴比？曼城簽入PSG新星

曼城又有新兵加盟，簽入18歲法國新星馬哈馬度辛加尼，呢位前鋒早前以自由身離開巴黎聖日耳門(PSG)，獲得多間大球會垂青，最終由「藍月亮」勝出，免轉會費獲得呢位新一代「入球機器」加盟，真係執到寶。

馬哈馬度辛加尼喺非洲國家馬里出世，隨家人移居法國，已進身法國U18小國腳，呢位天才射手2年前加入PSG青年軍，青年賽事上陣46場入42球，包括上屆歐洲青年聯賽有8球進帳，成為神射手得主之一，被睇好可以成為下一位麥巴比。

曼城鋒線人才濟濟，今次簽入馬哈馬度辛加尼，被視為一筆「未來投資」，佢加盟之後，可能會被外借去其他球隊，吸收比賽經驗。

另外，曼城中場占士麥艾迪可能離隊，諾定咸森林計劃以2,500萬鎊(約2.7億港元)收購呢位22歲英格蘭新星，接替即將轉投熱刺嘅基比斯韋特。

占士麥艾迪上季為曼城上陣27場入7球，並協助英格蘭奪得今屆U21歐國盃冠軍，佢只剩下1年合約，希望轉會爭取更多上陣機會，諾定咸森林正好趁機搶人。