水晶宮「降級」踢歐協聯　森林成最大贏家

里昂上訴成功，可以留喺法甲比賽，同時能夠出戰下屆歐霸盃，意味「姐妹球隊」水晶宮唔可以參加同一項賽事。歐洲足協現時正式確認，呢支英超球隊下季「降級」踢歐協聯，令原本踢歐協聯嘅諾定咸森林可望「升呢」獲得歐霸盃席位。

里昂上季排法甲第6位，水晶宮捧英足盃冠軍，理論上兩隊都獲得下屆歐霸盃席位，但由於兩間球會大股東都係美國商人泰斯達，根據歐洲足協「多重球會擁有條例」，兩間有相同擁有者嘅球會，唔可以參加同一賽事。

根據規例，里昂聯賽排名較高，取得歐霸盃入場券，水晶宮只能踢歐協聯，原本里昂因為財困被判罰降班，並失去歐洲賽資格，令水晶宮重燃踢歐霸盃希望，但現時又打回原形。

雖然泰斯達早前已出售水晶宮股份，但由於交易過咗歐洲足協設定嘅限期，水晶宮仍被視為違反「多重球會擁有條例」，只能轉戰歐協聯，並且要由附加賽開始踢。

據悉水晶宮管理層召開緊急會議討論對策，可能向國際體育仲裁法庭提出上訴，一旦上訴失敗，將由「歐協聯份子」諾定咸森林取得歐霸盃席位。