車路士願意出售積遜　AC米蘭想接貨

車路士前鋒尼高拉斯積遜長期表現欠佳，加上新加盟射手祖奧柏度演出神勇，令積遜前途更加暗淡，根據英國《每日郵報》爆料，車仔有意出售呢位24歲塞內加爾國腳，AC米蘭率先表態想接貨。

尼高拉斯積遜2年前由維拉利爾上「車」後，上陣81場入30球，由於經常浪費入波機會，備受批評，而且踢法粗野，5月英超對紐卡素，向對手「批肘」，被球證直接紅牌驅逐出場，上月世冠盃分組賽對法林明高，後備上陣僅4分鐘，踩踏對手又「見紅」，令領隊馬利斯卡非常不滿，因而傳出有意賣走呢位「莽夫」。

據悉車路士方面願意聽取其他球會報價，尼高拉斯積遜2年前轉會費為3,200萬鎊(約3.4億港元)，新買家起碼要出超過呢個價錢先至有得傾。AC米蘭近年多次簽入車仔球員，包括基奧特、羅夫度斯卓克、基斯甸普列錫、湯姆利，現時又想打尼高拉斯積遜主意，但未必有財力收購佢，可能提出借用。