球場情場雙失意　加拿祖又分手

曼聯翼鋒阿歷真度加拿祖被主帥魯賓艾摩廉打入冷宮，冇份參加季前集訓，等待轉會，場外亦受打擊，根據英國《太陽報》爆料，呢位21歲阿根廷國腳同女友Eve Garcia互相取消社交網Instagram(IG)關注，疑似又分手。

Eve Garcia今年1月曾經取消關注加拿祖嘅IG，當時已傳出兩人分手，後來Eve Garcia上載多張同加拿祖嘅家庭照粉碎傳聞。不過，好景不常，兩人今次互相取消關注對方IG，似乎關係又惡化，甚至已經分手，引起網民大肆討論，兩位主角都冇作出澄清，似乎默認。

阿歷真度加拿祖同Eve Garcia相戀多時，並已經有愛情結晶品，兩人嘅小朋友2023年10月出世，如果分手可能影響囝囝成長發展。