巴塞同意先借後買拉舒福特　曼聯要求強制買斷

巴塞隆拿斟介尼高拉斯威廉斯及路易斯迪亞斯接連觸礁下，曼聯翼鋒拉舒福特成為現時唯一選項，據報巴塞願以先借後買方式引入拉舒福特，條件是「福仔」必須減薪，曼聯則希望巴塞借用期滿強制買斷。

西班牙傳媒報道，巴塞主帥費歷克、會長拉波塔，與拉舒福特經理人舉行長達90分鐘會議，討論轉會事宜，曼聯已為拉舒福特設定外借條件，就係明夏強制買斷，巴塞則希望選擇性買斷，此問題要繼續磋商。

拉舒福特再度被巴塞睇中，主要原因係近日斟介另兩位目標人物都受阻，尼高拉斯威廉斯宣布同畢爾包續約，而利物浦嘅路易斯迪亞斯不但身價過高，而且拜仁慕尼黑強勢出手，現時市面上僅餘下拉舒福特一個選項。

拉舒福特想去巴塞人盡皆知，包括個人言論，與巴塞多位主力在社交媒體互動，並在夏天積極加操，為加盟巴塞做準備，而費歷克亦對今次交易持積極態度，認為拉舒福特踢法符合球隊戰術需要。

巴塞簽拉舒福特嘅另一條件係「福仔」必須減薪，減幅約40%，由現時周薪32.5萬鎊減至低於20萬鎊，相信「福仔」對此已有心理準備。