迪馬利亞回歸母會首戰3度落淚　入波受傷乜都齊

阿根廷老將迪馬利亞闊別18年後，重返母會羅沙里奧中央首仗上陣，立即喺周日(13日)凌晨阿甲入波，可惜比賽尾段受傷，羅沙里奧中央踢到補時，更加被葛度爾古斯逼和1比1。

迪馬利亞早前為賓菲加踢完世冠盃後，自由身離隊加盟羅沙里奧中央，今場聯賽主場出擊，成為佢重返母會炮頭，有4萬幾位球迷入場一睹佢嘅風采，會方亦為佢安排簡單歡迎儀式，全場人士為呢位37歲翼鋒熱烈鼓掌歡呼，令佢非常感動，搞到眼濕濕。

迪馬利亞以正選上陣，並喺78分鐘主射12碼入網，相隔18年再次為羅沙里奧中央入波，佢表現非常激動，瘋狂慶祝喜極而泣。

不過，好景不常，迪馬利亞踢到89分鐘受傷，需要用擔架車運送離場，佢掩面痛哭，似乎傷勢唔輕，亦係呢位球星今場第3度落淚。禍不單行，羅沙里奧中央踢到補時5分被葛度爾古斯逼和1比1，痛失2分。