車路士炒PSG奪冠 安歷基完場怒打祖奧柏度
車路士勇奪世冠盃冠軍！周一(14日)凌晨上演嘅王者之戰，賽前被睇低嘅車路士踢出漂亮一仗，上半場憑高爾彭馬嘅2射1傳連轟3球，最終3比0大勝巴黎聖日耳門(PSG)捧盃。今仗尾段瀰漫火藥味，完場後雙方更出現激烈衝突，PSG教練安歷基出手將祖奧柏度打到瞓低，後患無窮。
歐聯冠軍PSG今年勢如破竹，但今場意外被車路士狠狠打爆，高爾彭馬22分鐘禁區頂冷靜熨入領先，7分鐘後佢右路突破扣入中間，再次熨射同一個位入網。呢位英格蘭國腳完半場前交出靚助攻，造就祖奧柏度近門乖巧射入，車路士半場遙遙領先3比0。
換邊後PSG全力反撲，製造唔少入肉攻勢，但逃唔過神勇嘅車仔門將羅拔山齊士。比賽尾段滲出火藥味，PSG中場魯賓尼維斯因扯古古列拿頭髮被逐，車路士最終保住勝果捧盃。完場後基安盧基當拿隆馬同祖奧柏度爭執，安歷基加入後一巴掌打到祖奧柏度瞓低，令場面更加混亂。
車路士領隊馬利斯卡賽後表示：「呢班球員我冇嘢好講，佢哋值得有美好時刻，呢場比賽我哋喺頭10分鐘已經贏咗，球員踢到好嘅節奏同壓逼。對於車路士嘅未來，我當然好興奮，但我更加興奮嘅係，終於有3個星期時間可以放假休息！」