約基利斯非「廠」不入　經理人放棄佣金促成轉會

阿仙奴收購瑞典神鋒約基利斯接近完成！據轉會權威羅曼諾同各大媒體報道，阿仙奴同士砵亭嘅談判終於出現突破，約基利斯經理人同意放棄自己本來應得嘅10%佣金，令轉會以6,360萬鎊成交，預計今個星期內可以正式官宣。

約基利斯上年同士砵亭有「君子協定」，只要有球會出價6,000萬鎊，士砵亭就會放人，但會長華蘭達斯之後反口，要求至少收到7,000萬鎊，令轉會陷入膠着。27歲嘅約基利斯決心加盟阿仙奴，為轉會犧牲極大，早前已放棄士砵亭欠佢嘅200萬鎊獎金，但係士砵亭仲未滿足，為令交易達成，消息指約基利斯經理人亦同意放棄收取轉會費10%(約630萬鎊)佣金，成為交易達成嘅關鍵。

27歲嘅約基利斯同阿仙奴早已傾好5年合約，傳聞周薪達到20萬鎊，阿仙奴領隊阿迪達希望喺周六(19日)啟程去亞洲集訓前，完成季前所有重要收購，預計約基利斯日內就會飛倫敦做體測，趕及隨阿仙奴去新加坡同香港踢熱身賽。