張伯倫同比錫達斯解約　有望回流英超

曾效力阿仙奴同利物浦嘅英格蘭球星阿歷士張伯倫，2年前轉戰土超表現麻麻，日前更被比錫達斯賠錢提早解約，不過呢位31歲翼鋒仍有市場，據報新一季重返英超嘅列斯有意向佢拋出橄欖枝。

張伯倫加盟比錫達斯後，2季踢50場只入過5球，喺新帥蘇斯克查領軍後更不受重用，佢張合約原本到2026年夏天先到期，但球會決定賠償120萬鎊提早解約，呢個金額略為少於佢未來1年嘅人工，但張伯倫就可以即刻自由轉會。

據英國傳媒報道，重返英超嘅列斯聯正物色有經驗球員加盟，可以免費轉會嘅張伯倫成為目標之一，雖然佢依家嘅狀態未必可以勝任正選，但領隊法基更加睇重佢嘅豐富經驗，以及為球隊引入更多競爭，人工方面應該唔成問題。