Football

 

東亞錦 謝明良射爆南韓 日本成功衞冕

東亞錦煞科,結果日本憑謝明良上半場一箭定江山,以1比0擊敗南韓,成功衞冕,亦係「藍武士」歷來第3次奪冠,南韓繼上屆之後,再度屈居亞軍。

今仗交鋒之前,日韓兩隊同樣兩戰兩勝,日本得失球較佳暫壓南韓排榜首,「太極虎」積極搶攻,開賽初段就有羅相鎬左路殺入禁區起腳射遠柱,僅僅擦柱出界;日本唔使失波,轉個頭就打開紀錄,8分鐘,相馬勇紀左路大腳傳中,謝明良禁區內窩利抽射破網,日本領先1比0,亦係謝明良今屆賽個人攻入第5球。

之後主隊南韓全力搶攻,賽事漸漸演變成攻防戰,日本力守城池,當中不乏驚險攻門,包括下半場61分鐘南韓李昊宰12碼點頭槌攻門斜出,81分鐘李太錫左路遠距離笠射,被門將大迫敬介拍出底線,2分鐘後李昊宰近門凌空抽射,大迫敬介橫身撲出,最終日本補住1比0勝果完場,3戰全勝捧盃。