如夢初醒　PSG慘敗後急增兵

巴黎聖日耳門(PSG)世冠盃決賽慘敗後，證明陣容厚度不足，據報會方打算緊急增兵，打算收購強力前鋒，睇中域陀奧森漢同拉菲爾利亞奧。

法國傳媒報道，PSG眼看車路士藉世冠盃機會，一邊增兵一邊試陣，最後仲捧埋盃，此番運作令人印象深刻，會方高層深入檢討過後，認為球隊一直欠缺正宗中鋒，因此今夏增援目標亦向此位置埋手。

PSG增兵目標，就係一直去向未明嘅域陀奧森漢，以及AC米蘭前鋒拉菲爾利亞奧，據報PSG高層甘波斯近日與域陀奧森漢經理人取得聯繫，這位26歲尼日利亞前鋒正被拿玻里掛牌出售，同加拉塔沙雷嘅轉會談判停滯不前，沙特豪門希拉爾只係其最後選擇，如今PSG介入，成事機會唔低。

至於同為26歲嘅葡萄牙國腳拉菲爾利亞奧，AC米蘭視之為進攻核心，不過如果PSG開出無法拒絕報價，相信AC米蘭亦只能忍痛放人。