Football

 

皇馬又搵利物浦着數 半價收購干拿迪

利物浦中堅伊巴希馬干拿迪尚餘1年約,續約談判停滯,出售價格亦大受影響,據報皇家馬德里只願出利物浦提出嘅半價收購,轉會費不高於2,500萬歐元(約2.3億港元),好難傾得埋。

西班牙傳媒報道,利物浦喺管理球員合約問題上成日出事,上季已經有沙拿、雲迪積克同阿諾特3人合約到期困擾球隊一整季,結果阿諾特自由身離隊轉投皇馬,嚟緊今季就有干拿迪合約即將到期,皇馬又打算搵着數。

雖然續約談判停滯,但利物浦態度強硬,今夏只接受5,000萬歐元轉會費報價,先會出售干拿迪,但皇馬明知干拿迪明年夏天回復自由身,到時可以免費簽入,所以今夏唔打算出高價收購,只願出利物浦叫價嘅一半,亦即2,500萬歐元,做法唔厚道,但都好合理。

據報26歲嘅干拿迪一係續約留喺利物浦,如果離隊只會去皇馬,所以皇馬可謂「坐定粒六」。