巴塞隆拿簽入「朗尼」　拉舒福特又冇份

西甲冠軍巴塞隆拿正式宣布簽入「朗尼」巴迪治，呢位19歲瑞典翼鋒曾於童年時候參觀巴塞主場，自此成為忠實球迷，現時夢想成真，成為巴塞球員，演繹最佳勵志故事。反觀，一直盛傳想加盟巴塞嘅曼聯前鋒拉舒福特，仍然未有下文，加上巴迪治來投後，「福仔」登陸西甲可能美夢落空。

巴迪治(Roony Bardghji)2023年11月歐聯後備上陣，為哥本哈根射入絕殺1球，以4比3擊敗曼聯，一戰成名。不過，呢位「瑞典朗尼」上年因為十字韌帶受傷，缺陣長達11個月，今年3月復出後僅上陣6次，能否恢復最佳水平成疑。

由於巴迪治就快約滿，巴塞隆拿今次只用200萬歐元(約1,820萬港元)，就成功向哥本哈根收購佢，雙方簽4年合約，並且買一送一，巴迪治嘅細佬亦一齊加盟巴塞隆拿。

據悉巴迪治將會隨同巴塞隆拿參加季前熱身賽，至於新一季能否留喺一隊比賽，抑或踢B隊，甚至外借去其他球隊，就要睇佢喺熱身賽表現而定。