轉會首課操練即甩底　摩連奴炮轟祖漢杜蘭？

哥倫比亞前鋒祖漢杜蘭，月初由艾納斯外借費倫巴治，不過呢位21歲球星竟然喺第1課操練就無故「甩底」，據報教練摩連奴亦唔客氣，公開批評祖漢杜蘭唔尊重球會，似乎佢喺土超都冇運行！

祖漢杜蘭今年初由阿士東維拉高價轉會艾納斯，18次上陣入咗12球，但只係短短半年又再被外借，今夏轉投摩連奴執教嘅費倫巴治，點知日前球會開操，祖漢杜蘭並冇現身。西班牙《馬卡報》報道，摩連奴對祖漢杜蘭失蹤好不滿，更向記者表示：「呢個行為好唔尊重費倫巴治，球會有清晰嘅規矩，邊個唔遵從就要面對後果。等祖漢杜蘭現身，我哋就會同佢傾，如果佢會現身的話。」

摩連奴治軍向來講求紀律，當年執教曼聯同皇家馬德里，對唔守紀律嘅大牌球星好似保羅普巴同賓施馬，一樣都係「冇面畀」。不過，費倫巴治隨後澄清，指祖漢杜蘭會直接飛去葡萄牙出席球會喺當地嘅集訓營，亦否認摩連奴對祖漢杜蘭有任何不滿。