瑞士女足創造歷史　振興國家經濟

瑞士舉辦今屆女子歐國盃決賽周空前成功，唔單止國家隊歷史性殺入8強，賽事亦為主辦國帶嚟龐大經濟效益，標誌住女子足球嘅迅速發展。

有信用卡公司統計顯示，今個月瑞士遊客比上年同期大增12%，當中嚟自荷蘭、德國、波蘭同英格蘭嘅遊客升逾20%，明顯係受歐國盃熱潮帶動，8個主辦城市嘅消費數字，亦比去年同期增加27%。另外，據歐洲足協公布數字，今屆分組賽總入場人數超過46.1萬人，打破歷來入場紀錄。

瑞士女足隊長莉亞華迪表示：「依家係瑞士歷史性時刻，我哋向全世界展示瑞士人可以做到乜嘢...非常神奇！冇人預料到依家瑞士發生嘅事......爆棚嘅球場、球場內外嘅得於都比預期之中更加犀利。」隨住瑞士女足今屆神奇之旅，足總表示目標係喺2027年，將目前4萬名註冊女足球員，增加一倍至8萬。