互射12碼9人宴客！英格蘭女足奇情入4強

周五(18日)凌晨女子歐國盃8強上演奇情之戰，衞冕嘅英格蘭女足喺先輸2球下，尾段連追兩球逼和瑞典女足。去到互射12碼決勝，英格蘭有4個球員宴客，但瑞典更差，竟然有5個球員失手！最後英格蘭喺突然死亡階段射贏3比2晉級4強，將同意大利女足爭入決賽。

英格蘭今場開局失魂，2分鐘就被阿絲娜妮攻陷，25分鐘再畀碧克絲甸紐絲射爆輸到2球。英格蘭尾段大變陣，上屆決賽入波功臣基莉嘅入替成為轉捩點，佢79分鐘交靚傳中畀邦朗絲頂入，102秒後米雪艾耶萬再為英格蘭追平，兩隊之後連加時再冇入球，要射12碼分勝負。

先射嘅英格蘭由阿歷西亞蘿素操刀領先，但之後蘿倫占士、貝芙美特同阿歷絲格蓮活3人都宴客，不過瑞典頭4輪亦有兩人射失。去到決定性嘅第5輪，基莉為英格蘭射入，瑞典如果都入就晉級，但關鍵一射竟然派出門將珍妮花法克主理，結果佢一射衝天。

進入突然死亡階段，雙方第1輪再次同步宴客，英格蘭隨後由邦朗絲射入，而瑞典嘅絲美娜賀姆寶成為球隊第5個宴客球員，英格蘭得以戲劇性晉級。2撲12碼嘅英格蘭門將漢娜咸頓表示：「太緊張！睇得緊張、踢得仲緊張，每次撲完都想隊友射入，但瑞典龍門都好勁，依家終於鬆口氣，球迷嘅支持畀我哋好大力量。」