曼聯新訓練場下月開張　內置髮型屋幫球員執靚個樣

曼聯近年奉行緊縮政策，不過搞基建就不遺餘力，全面翻新嘅卡寧頓訓練基地下個月正式開張，據報新卡寧頓內增設唔少休閒設施，更會係英國第1個內置髮型屋嘅訓練場，比賽前可以幫球員執靚個樣！

曼聯上年斥資5,000萬鎊重建卡寧頓，預計曼聯完成嚟緊嘅美國之旅後，下月返英國就可以使用。英國《泰晤士報》日前率先曝光新卡寧頓嘅設計，最特別係增設唔少休閒設施，希望球員練波後多啲時間留喺度，而唔係急急腳趕返屋企。

據報新嘅一隊訓練中心有兩層，地下有更衣室、泳池、健身室同理療室，而二樓主要係畀球員做休閒區域，包括高級飯堂同埋髮型屋，據報髮型屋內有幾個座位同理髮器材，但目前唔清楚有冇常駐髮型師，定係要球員自己帶私人髮型師去。