首個100萬鎊女足誕生！阿仙奴破紀錄簽紅軍猛將

阿仙奴女足贏得歐聯冠軍後，繼續增兵加強實力，周四(17日)宣布以破世界紀錄轉會費，簽入利物浦女足球星奧莉華史密絲，呢位加拿大女足國腳亦成為首個身價達100萬鎊嘅女足球員。

現年20歲嘅奧莉華史密絲同阿仙奴簽約4年，今次轉會令佢打破車路士喺今年1月，用88萬鎊收購美國國腳娜奧美姬瑪嘅轉會費紀錄。奧莉華史密絲喺15歲就踢國家隊，上季為利物浦上陣25場入9球。

司職前鋒嘅奧莉華史密絲簽約後表示：「好榮幸加盟阿仙奴，有機會爭逐英超同歐聯冠軍係我嘅夢想，酋長球場嘅氣氛非常神奇，我急不及待要落球場親身感受。」