利物浦同伊基迪基傾掂6年約　紐卡素投降

利物浦同紐卡素嘅「前鋒角力」又有新進展，紐卡素企硬唔賣阿歷山大伊沙克後，「紅軍」即刻轉移目標，據報閃電同法蘭克福前鋒伊基迪基傾掂6年合約，消息指紐卡素已經接受被「截胡」現實，將改為斟介賓福特前鋒尤尼韋沙。

紐卡素一直想為伊沙克物色前鋒拍檔，但7,000萬鎊收購伊基迪基被拒絕後，利物浦隨即出手搶人，多個英國媒體指「紅軍」已同該23歲法國前鋒傾掂6年合約，依家會同法蘭克福商討轉會費，預料會喺7,500萬鎊至8,000萬鎊嘅價成交。

轉會權威羅曼諾爆料，伊基迪基已表明只想加盟利物浦，而紐卡素已經「投降」退出爭奪戰。報道指紐卡素依家主攻尤尼韋沙，賓福特叫價高達5,000萬鎊，而紐卡素開價只係3,500萬鎊，雙方會就轉會費繼續談判。