坦哈格暗示簽安東尼：我當佢係仔！

曼聯球星安東尼馬菲奧斯上季外借貝迪斯成功「翻生」，不過夏天重返曼聯後仍未搵到買家接手，近日利華古遜教練坦哈格公開表示，佢將安東尼當係親生仔咁看待，暗示有機會出手斟介。

坦哈格喺執教阿積士同曼聯期間，都同安東尼共事，雖然兩人分別敗走曼聯，但就有機會喺德甲重聚。今夏接掌利華古遜帥印嘅坦哈格，接受德國《圖片報》訪問表示：「安東尼有高質素，我已經簽過佢2次，佢就好似我個仔一樣，我依家仍然當佢係親生仔。」

被問到利華古遜係咪準備出手簽安東尼，坦哈格就回應：「我哋呢一刻冇興趣簽安東尼，但未來發展係點就放長雙眼睇。」據報白禮頓同RB萊比錫都對安東尼有興趣，而貝迪斯亦積極研究再次引入安東尼嘅方案。