沙特5年合約值90億！雲尼斯奧斯會點揀？

沙特聯賽一向希望羅致皇馬巴西前鋒雲尼斯奧斯祖利亞，但一直冇回音，據報沙職聯最近又開出5年總值10億歐元(約91.4億港元)超級合約，而畀皇馬嘅轉會費亦係破世界紀錄嘅3.5億歐元(約31.9億港元)。

25歲嘅雲尼斯奧斯效力皇馬7年，一直係進攻主力，但自從上季基利安麥巴比加盟，佢嘅核心地位有動搖，同皇馬合約僅餘2年，如果再唔續約，就會被皇馬出售。

西班牙傳媒報道，皇馬同雲尼斯奧斯嘅續約談判並唔順利，雲尼斯奧斯要求年薪增至3,000萬歐元，所以個人待遇要同麥巴比對齊，雙方一直未能達成協議，沙職聯此時介入，令續約增添變數。

沙特奪得2034年世界盃主辦權，沙職聯未來幾年繼續擴軍，佢哋睇中雲尼斯奧斯，希望邀請呢位巴西前鋒擔任沙特世界盃形象大使，再送上超級合約，期望打動對方轉戰沙職。對於天價轉會費，皇馬肯定唔會拒絕，至於雲尼斯奧斯點揀，就係另一問題。