基亞利殊慘遭「隔離」　三隊有興趣簽佢

根據英國《電訊報》爆料，曼城中場基亞利殊已經同意今夏獨自操練，並為自己搵新出路，據悉2支英超球隊愛華頓、韋斯咸及意甲冠軍拿玻里都有興趣簽入呢位29歲英格蘭國腳。

基亞利殊4年前以1億鎊轉會費由阿士東維拉加盟曼城以來，一直踢唔出應有身價，上季32次上陣僅入3球，並經常受傷，領隊哥迪奧拿早已經打算放棄佢，包括將佢踢出世冠盃大軍名單。

最新消息指哥迪奧拿唔需要基亞利殊參加季前集訓，賣走呢位「水貨」已成定局，佢亦接受安排，將會獨自操練，以及同其他球會接觸，傾轉會事宜。

基亞利殊只剩下2年合約，估計現時身價僅值2,500萬鎊，愛華頓、韋斯咸及拿玻里都想趁機執平貨，現時就要睇佢想留喺英超，抑或去國外搵食。