取代奧拿拿　曼聯睇中「高圖爾斯2.0」

曼聯門將奧拿拿早前受傷需要長抖2個月，主帥魯賓艾摩廉計劃簽入新門將，根據英國《太陽報》爆料，比甲球隊安特衛普嘅23歲新星辛尼拉文斯成為紅魔鬼收購目標。

據悉曼聯早於今年1月已經開始留意辛尼拉文斯表現，加上奧拿拿受傷，會方決定出手斟介呢位比利時鋼門，出價1,700萬鎊(約1.8億港元)，由於辛尼拉文斯只剩下2年合約，安特衛普可能會趁機出售佢。

身高1米93嘅辛尼拉文斯上季總共作出173次成功撲救，平均每場4.3次，成功撲救率達78%，被譽為當今最具潛力嘅新一代比利時門將，甚至被睇好將來成就可媲美效力皇馬嘅比利時門神泰拔高圖爾斯，如果曼聯可以搶先收購辛尼拉文斯，或者能夠解除奧拿拿呢個「防線炸彈」。