盧卡文受傷抖數周　打亂轉會部署

盛傳國際米蘭計劃收購阿特蘭大前鋒盧卡文，但最新消息指呢位27歲尼日利亞國腳近日操練期間，感到小腿痛楚，可能需要抖數星期，隨時影響轉會大計。

根據「轉會權威」記者羅曼諾(Fabrizio Romano)爆料，國際米蘭會方已經聯絡阿特蘭大管理層，提出以4,000萬歐元(約3.6億港元)收購盧卡文，呢支「神奇球隊」還價要求最少5,000萬歐元。

　

盧卡文效力阿特蘭大3年，上陣117場入52球，包括上季40次披甲有20球進帳及7次助攻，創下職業生涯單季最多入球紀錄。不過，盧卡文希望離隊接受挑戰，國米趁機招攬佢，甚至雙方已傾掂個人待遇條件。

據悉阿特蘭大唔排除出售盧卡文，但為免壯大聯賽對手，如果意甲球隊收購盧卡文，最少要5,000萬歐元，至於出售畀其他聯賽球隊，會方願意「減價」，4,000萬歐元都會接受，現時就睇盧卡文會否考慮去其他聯賽搵食。

不過，盧卡文近日操練期間，疑似小腿受傷，將接受進一步檢查，意大利傳媒指佢可能需要抖數星期，可能嚇窒買家。