曼聯首場熱身賽悶和0比0 根夏擔正踢到扯火
曼聯新球季周六(19日)正式展開，正喺瑞典集訓嘅「紅魔鬼」同列斯聯進行首場熱身賽，雖然馬菲奧斯根夏同迪亞高李安兩名新名擔正，但係球隊進攻表演未見起色，根夏同海倫兩名前鋒更踢到扯晒火埋怨隊友，不過領隊魯賓艾摩廉就表示滿意今次練兵成效。
今場係曼聯第1場熱身賽，球員未上力係意料中事，以6,250萬鎊轉會費加盟嘅根夏，今場擔任「10號位」表現落力，多次博到對手犯規，但入肉攻勢唔多，上半場9射只得1中龍，黃金機會出現喺42分鐘，阿密特迪亞路回傳，根夏本來可以順勢射門，但小將奧比馬田就爭食，高難度轉身抽射斜出，激到根夏即場大發脾氣。
根夏向奧比馬田大發脾氣：https://x.com/i/status/1946570202814034364
下半場曼聯換晒11個球員，雖然繼續控制大局，但進攻依然有心無力，海倫亦曾因達洛治傳球太慢而「爆粗」大鬧，結果曼聯全場19次射門得4次中目標，以0比0悶和完場。曼聯完成瑞典訓練營，返英後將進行美國之旅，下場賽事係下周日(27日)對韋斯咸。
雖然未能入波，但領隊艾摩廉就讚揚根夏表現：「我哋中路缺乏速度，但仍然製造到機會，根夏顯示出球隊需要嘅元素，佢可以喺前場拎波，然後展開侵略性進攻嘅人，佢同般奴費南迪斯嘅合作仲未撻着，但根夏係個好易夾嘅球員。今場只係開始，我哋會慢慢建立聯繫同提升質素。」