阿仙奴宣布亞洲之旅30人名單　3位新兵有份

阿仙奴宣布出戰「亞洲之旅」季前熱身賽30人大軍名單，今夏新加盟嘅新兵之中，門將阿列沙巴拿加、中場蘇比文迪、基斯甸洛加特有份隨隊，但最新入「廠」嘅翼鋒馬度基獲延長假期，榜上無名。

兵工廠今次陣容非常強大，布卡約沙卡、馬田奧迪加特、米基爾馬連奴、夏維斯，以及身價達1億鎊嘅中場迪格蘭賴斯等主力都隨隊出征。兵工廠今夏已經豪花超過1.2億鎊(約12.6億港元)收購4位球員，最新加盟嘅馬度基因為早前為車路士踢世冠盃，需要時間休息，冇份參加「亞洲之旅」季前熱身賽，另外3位新兵阿列沙巴拿加、蘇比文迪、基斯甸洛加特可以趁今次機會同隊友磨合，尤其是湯馬士柏迪離隊後，2位新防守中場蘇比文迪、基斯甸洛加特嘅表現令人關注。

阿仙奴「亞洲之旅」首站去新加坡踢2場，包括7月23日同AC米蘭交鋒，4日之後對紐卡素，7月31日喺香港啟德體育園主場館鬥熱刺，上演「北倫敦打吡」。