基比斯韋特熱身賽上陣　森林企硬唔賣

熱刺早前啟動諾定咸森林中場基比斯韋特「離隊條款」，以為殺對方一個措手不及，點知被森林反控「非法斟介」，令轉會陷入僵局。森林周六(19日)熱身賽對摩納哥，基比斯韋特獲派正選上陣，森林表示佢係「非賣品」。

熱刺開價6,000萬鎊收購基比斯韋特，觸發呢位中場合約內嘅「離隊條款」，但森林指出該條款受保密協議保護，熱刺喺事前未獲森林批准下，得悉有關條款，明顯係做出「非法斟介」。兩間球會仍就轉會商討，不過森林周六對摩納哥，基比斯韋特仍然正選登場，最終兩隊踢成0比0平手。

25歲嘅基比斯韋特踢咗45分鐘，離場嗰陣向球迷做心型手勢，但消息指佢仍然心繫熱刺，但森林堅持佢係「非賣品」。森林守將奧拉艾拿表示：「基比斯韋特好專業，我唔知佢轉會詳情，但我哋都係職業球員，有需要做嘅工作，佢跟大隊一齊練波、比賽，表現得非常專業。」