【有片】利物浦弗爆訪港 熱身賽大勝5比0
將到訪香港進行季前備戰嘅利物浦，周一(21日)凌晨出發前喺訓練基地進行閉門熱身賽，強陣出擊下5比0大勝英冠球隊史篤城，兩位「邊緣人」達雲紐尼斯同費達歷高基艾沙大踢爭氣波包辦4球。不過利物浦隨後公布訪港名單，穆罕默德沙拿、科利安華迪斯等精銳盡出，但基艾沙就榜上無名。
利物浦東訪前再加插熱身賽，貴價德國新兵華迪斯首度亮相，不過主角係盛傳將被賣走嘅紐尼斯，佢喺上半場短短14分鐘內連中三元，加上小將恩古莫亞入波，帶住4球優勢返更衣室。換邊後利物浦換走10人，最後再由基艾沙入波，湊成5比0大捷，顯示球隊狀態非常之好。
利物浦賽後公布亞洲之旅名單，華迪斯、謝利美費林邦、米路斯卻基斯、馬馬達舒維利等新兵悉數在列，唯一意外係今場入波嘅基艾沙冇份，傳聞佢將會離隊重返意甲。不過同樣盛傳會被賣走嘅紐尼斯同路易斯迪亞斯，都有跟大隊登上訪港航班。
至於利物浦日前同意9,500萬歐元收購法蘭克福前鋒伊基迪基，目標係同佢盡快簽約，畀佢「半途」加入亞洲之旅。「紅軍」到訪香港後，周四(24日)會有公開操練，周六(26日)就會同AC米蘭喺啟德踢熱身賽，之後就會轉飛日本對橫濱水手。