拉舒福特飛抵巴塞簽約　減薪15%買斷費曝光

曼聯日前同意將拉舒福特外借巴塞隆拿後，轉會工作正火速進行，「福仔」喺周一(21日)凌晨已坐私人飛機去到巴塞隆拿，完成體測後會簽署1年借用合約。據報拉舒福特為促成轉會，願意減薪15%，而且「買斷條款」據報只係2,600萬鎊，非常抵玩！

拉舒福特一直以加盟巴塞為夢想，權威記者羅曼諾報道，呢位27歲前鋒同意減薪15%促成轉會，佢抵達巴塞後亦向球迷豎起手指公，心情大靚。巴塞隆拿街頭亦有拉舒福特着巴塞波衫慶祝嘅塗鴉，似乎球迷對呢位英格蘭國腳都好受落。

據西班牙《世界體育報》爆料，巴塞完成1年借用後，有權選擇用2,600萬鎊將拉舒福特「買斷」，呢個「買斷費」比起曼聯今夏要求嘅4,000萬鎊轉會費大幅下降，如果拉舒福特新球季可以踢出水準，就有望長期留效巴塞。