無緣訪港　希拉爾宣布退出沙超盃

25/26球季沙特超級盃，將喺8月19日至23日期間，假香港大球場舉行，早前有傳希拉爾因為殺入世冠盃8強，休息時間不足將會選擇棄賽，希拉爾周一(21日)正式發出聲明，落實放棄來港比賽。

希拉爾喺聲明入面解釋，佢哋喺7月4日先完成世冠盃賽事，之後因航班問題滯留美國3日，如果球隊再參加沙超盃，球員放假時間肯定達唔到法定要求嘅「最少28日」，而且希拉爾為符合呢項規定，已經被逼將新球季開操時間推遲。另外，希拉爾強調沙超盃最初抽籤嗰陣，並冇公布賽事會喺香港舉行。

沙特超級盃早前已落實賽程，艾納斯在8月19日晚上8時硬撼伊蒂哈德，20日晚上8時的戲碼為艾卡迪沙對希拉爾，並於8月23日晚上8時舉行決賽。據報希拉爾棄戰沙超盃，可能改由聯賽第5位，兼應屆亞冠精英盃冠軍吉達艾阿里出戰。