華迪斯紅軍首演獲大讚　踢呢個位要犧牲一人

利物浦訪港前，喺閉門熱身賽5比0大勝史篤城，以破英超轉會費紀錄1.27億鎊加盟嘅科利安華迪斯，喺今場亦首度亮相，出任「10號位」嘅佢亦交出2次助攻，表現獲網民激讚，但華迪斯嘅光芒，就令蘇保斯拉爾要作出犧牲。

22歲嘅華迪斯可以勝任中前場多個位置，前領隊高普早前亦表示，唔知道佢可以喺邊個位置融入「紅軍」，進攻中場、左翼、「8號位」同「假9」都有可能，而根據今場對史篤城所見，領隊施洛安排佢踢最擅長嘅「10號位」。

利物浦開紀錄嘅入波，就係華迪斯喺中場推進後交出直線，對手解圍失誤後被紐尼斯射入；完半場前華迪斯再交助攻，畀小將恩古莫亞射門省中人彈入。大批網民留言大讚：「利物浦簽咗個世紀天才」、「睇3秒就知華迪斯係世界級球員」。

華迪斯如果坐穩10號位，匈牙利國腳蘇保斯拉爾好可能要作出犧牲，今場佢就被調去試踢右閘位置，尤其賴恩格雲貝治同阿歷斯麥亞里士打嘅中場正選相當穩陣，蘇保斯拉爾可能需要喺其他位置爭取更多上陣時間。