伊沙克轉會爆新劇情　經理人同希拉爾密斟

紐卡素前鋒阿歷山大伊沙克去向再現變數！利物浦日前高調展開斟介，一石激起千層浪，雖然紐卡素表明唔會放人，利物浦亦已轉簽伊基迪基，不過消息指伊沙克正考慮希拉爾聘約，經理人正同沙特代表密斟，並表示會考慮所有選擇，唔排除會去中東搵食！

紐卡素周六(19日)踢熱身賽，領隊艾迪侯域證實伊沙克受「轉會傳聞」影響而缺陣，估唔到拒絕利物浦後，依家輪到希拉爾出手，中東媒體指希拉爾願意出價1.3億歐元轉會費，開出嘅薪酬亦會高於所有歐洲球會所能付出嘅數字，希拉爾教練施蒙尼恩沙基表明對伊沙克志在必得。

伊沙克經理人加坦接受沙特報章《Arriyadiyah》訪問，講到伊沙克去留問題嗰陣回應：「關於伊沙克會走定係留喺紐卡素，詳情我係唔會透露，但我哋確實研究同分析緊所有選項，伊沙克嘅下一步可能好快就會有結論。」