士砵亭新前鋒就位　阿仙奴望約基利斯趕及訪港

正喺新加坡進行季前集訓嘅阿仙奴，轉會工作密鑼緊鼓進行，收購瑞典前鋒約基利斯亦邁向終點。據報士砵亭已傾掂簽入艾美利亞前鋒路爾斯蘇亞雷斯，意味約基利斯即將可以「放行」，阿仙奴希望可以短期內落實轉會，安排佢中途加入亞洲之行。

阿仙奴同士砵亭傾掂6,350萬鎊收購約基利斯，只剩當中嘅獎金分配仍要商討，士砵亭亦已準備放人，並動用超過3,000萬鎊收購路爾斯蘇亞雷斯作替補。阿仙奴領隊阿迪達周一(21日)喺新加坡嘅記者會，表示「唔評論其他隊球員」，但表明新兵加盟「愈快愈好」。

報道指如果轉會短期內完成，阿仙奴會安排約基利斯同另一新兵基斯甸摩斯基拿，一齊飛去亞洲歸隊，但如果轉會拖延至下個星期，就會畀佢哋留喺英國準備。阿仙奴周三(23日)會對AC米蘭，周日(27日)繼續留喺新加坡對紐卡素，下周四(31日)就喺香港對熱刺。