麥比奧莫成曼聯史上第7貴收購　愈貴愈廢

根據著名轉會網站《Transfermarkt》統計，曼聯宣布簽入賓福特翼鋒麥比奧莫，固定轉會費為7,500萬歐元，同迪馬利亞並列紅魔鬼史上第7高價收購，但貴嘢唔代表好嘢，睇番前10位最貴收購球員之中，大部分踢唔出應有身價，難免令人擔心呢位喀麥隆國腳又會成為另一件「水貨」。

曼聯史上最貴收購係2016年以1.05億歐元(約9.63億港元)向祖雲達斯買入保羅普巴，最諷刺係呢位法國國腳屬於紅魔鬼青訓球員，但2012年免費放走佢，換言之，白白送咗超過1億歐元畀祖記。

普巴回巢效力6季，大部分時間演出令人失望，甚至同前主帥摩連奴鬧不和，加上經常受傷，結果2022年又以自由身離隊。

第2貴係3年前以9,500萬歐元收購阿積士翼鋒安東尼馬菲奧斯，呢位巴西國腳為曼聯上陣96場僅入12球，反而上季外借去貝迪斯4個月踢26場已入9球，似乎係紅魔鬼「耽誤」佢前途。

至於第3位貴嘅哈利馬古尼曾經係「防線炸彈」，直至上季先至回勇。其餘查頓辛祖、盧卡古、海倫、迪馬利亞都屬於球壇經典失敗收購例子。

曼聯史上10大最貴收購

保羅普巴 1.05億歐元

安東尼馬菲奧斯 9,500萬歐元

哈利馬古尼 8,700萬歐元

查頓辛祖 8,500萬歐元

盧卡古 8,470萬歐元

海倫 7,780萬歐元

迪馬利亞 7,500萬歐元

麥比奧莫 7,500萬歐元

馬菲奧斯根夏 7,400萬歐元

卡斯米路 7,070萬歐元