一個原因　熱刺焗留孫興民參加亞洲之旅

早前有消息指英超勁旅熱刺已經通知隊長孫興民今夏可以離隊，但仍然要求佢參加亞洲之旅季前熱身賽，原來係錢作怪。根據英國《電訊報》爆料，如果「孫仔」缺陣8月3日「首爾站」對紐卡素，熱刺會損失呢場比賽75%收入。

雖然熱刺同孫興民延長合約1年，但同時通知呢位33歲南韓國腳可以喺今夏同其他球會傾加盟事宜，如果收到合適報價，會方願意出售佢。不過，熱刺唔會喺亞洲之旅結束前放走孫興民，並一定要佢出戰「首爾站」對紐卡素。

據悉今場熱身賽合約列明，如果孫興民抵達首爾，但冇上陣，熱刺只可以收到一半戲金，若然佢冇去首爾，戲金更加只會得番四份之一。熱刺為財政着想，必然確保孫興民屆時上陣對紐卡素。因此，熱刺最快都要等到完成亞洲之旅後，再決定孫興民前途。