熱刺放棄李察利臣　巴甲雙雄爭逐

熱刺今個夏天簽入古度斯同馬菲斯泰爾兩位翼鋒，加上原有嘅蘇蘭基、孫興民、古路施夫斯基同班倫莊臣，前線已有人滿之患，據報球隊決定放棄巴西前鋒李察利臣，富明尼斯同彭美拉斯都有興趣得到呢位巴西國腳。

熱刺日前熱身賽對雷丁，李察利臣並冇參加，雖然佢因為上月代表巴西比賽而延遲歸隊，但消息指熱刺領隊法蘭克，並冇將佢擺喺未來計劃之中，夏天好大機會將佢賣走，而巴甲嘅富明尼斯同彭美拉斯喺世冠盃得到豐厚獎金，有足夠銀彈提出收購。

巴西媒體《Terra》報道，彭美拉斯目前最落力去斟介，尤其佢哋即將用3,500萬歐元賣李察里奧斯去賓菲加，加上之前世冠盃嘅收入，有足夠財力簽入李察利臣。彭美拉斯喺2月份，已用破巴甲紀錄嘅2,550萬歐元簽入前鋒域陀洛基，雄心勃勃。