拉舒福特巴塞首戰 上演「曼聯打吡」?
根據「轉會權威」記者羅曼諾(Fabrizio Romano)爆料,拉舒福特已經同巴塞隆拿簽約,正式成為呢支西甲勁旅球員,將會參加季前熱身賽,英國《太陽報》指拉舒福特加盟巴塞第一擊,好大機會遇上現時效力FC首爾嘅前曼聯隊友連格。
據悉巴塞隆拿以先借後買方式簽入拉舒福特,明夏有權以2,600萬鎊(約2.76億港元)買斷呢位27歲英格蘭國腳,巴塞隆拿將會展開「亞洲之旅」季前熱身賽,首站將於7月27日喺日本對神戶勝利船,由於時間比較緊迫,拉舒福特未必趕得切上陣,比較大機會等到7月31日作客韓職球隊FC首爾,先至會披甲,意味屆時有機會遇上老友連格。
連格效力曼聯期間同拉舒福特非常老友,即使轉投諾定咸森林後,兩人亦經常有聯絡,呢位32歲中場上年2月加盟FC首爾,上陣49場入12球及6次助攻,雙方脫「魔」後交鋒,別具意義,令呢場比賽更有噱頭。
巴塞隆拿將會喺南韓踢2場熱身賽,除咗對FC首爾之外,仲會同FC大邱對壘。