麥巴比將改着10號　背後隱藏「重大戰略」

根據西班牙《馬卡報》爆料，原本身穿9號嘅皇馬前鋒基利安麥巴比，將於新一季改着10號，但並非佢自己要求，而係球會管理層「落柯打」，皆因呢位法國球星轉新冧巴後，可望為球會賣出更多波衫，創造巨大商業利益。

基利安麥巴比效力巴黎聖日耳門期間大部分時間，仿傚偶像C朗着7號，踢國家隊着上球王施丹嘅10號，佢上年夏天加盟皇馬，呢2個號碼分別屬於雲尼斯奧斯祖利亞、莫迪歷，惟有着9號，同C朗加盟皇馬首季一樣。

隨住莫迪歷今夏離隊，轉投AC米蘭，騰出10號球衣，據悉會方已安排「麥總」做新10號仔，講到尾都係錢作怪，預料會吸引大量球迷跟風，購買印有麥巴比大名嘅皇馬10號波衫，為球會帶來巨額收入。

值得一提，巴塞隆拿新星拉明耶馬早前改着10號，呢件波衫單日銷售額高達210萬美元(約1,600萬港元)，皇馬有樣學樣，出產麥巴比10號球衣「吸金」。