【官宣】拉舒福特着巴塞14號　日本首演被逼取消

巴塞隆拿周四(24日)宣布，英格蘭前鋒拉舒福特以借用身份加盟，「福仔」將會着上告魯夫、亨利曾經着過嘅14號波衫。拉舒福特簽約後，原本會隨大軍飛去亞洲踢季前熱身賽，不過巴塞突宣布因主辦單位「嚴重違約」，周日(27日)對神戶勝利船嘅日本站賽事將會取消。

拉舒福特由曼聯外借巴塞1季，呢位前鋒周四亮相，舉起14號波衫，佢話：「加盟巴塞係夢想成真，喺呢度我會好快樂，我依家好興奮同好渴望去幫助球隊爭勝。我睇到巴塞嘅雄心壯志，目標係要比上季更好，我亦要努力交出最好嘅自己。」

巴塞本來周四就起程亞洲之旅，不過行程突然叫停，第1站去日本已經取消。巴塞發聲明表示：「由於主辦方嚴重違約，球會需要取消周日喺日本嘅賽事。如果主辦方能夠作出調整，符合到部份條件，球隊仍會飛去南韓進行之後兩站賽事。巴塞對於今次事件，以及大批受影響嘅日本球迷表示遺憾。」