車路士仲未收手　荷蘭雙星即將加盟

近年轉會市場瘋狂買人嘅車路士，今個夏天繼續瘋狂掃貨，據報佢哋已傾掂3,500萬鎊收購阿積士中堅祖利爾哈圖，同時正力斟另一荷蘭國腳沙維西蒙斯，成事嘅話夏天買人花費將突破3億鎊大關！

權威記者羅曼諾報道，車路士即將簽入荷蘭19歲國腳祖利爾哈圖：「車路士同哈圖傾掂個人條款，哈圖向阿積士提出轉會要求，兩間球會談判進入最後階段，轉會費約3,500萬鎊，哈圖已表明佢想加盟車路士嘅決心。」

除此之外，車路士亦正進行引入沙維西蒙斯嘅操作，羅曼諾爆料：「車路士同西蒙斯斟介進展良好，西蒙斯對加盟車路士表示歡迎，車路士希望盡快傾掂，再同RB萊比錫斟介。」沙維西蒙斯已表明今夏會離隊，拜仁慕尼黑同阿仙奴盛傳都有興趣搶人，RB萊比錫叫價5,600萬鎊。

車路士夏天已簽入祖奧柏度、利安戴納、比諾傑坦斯、達里奧艾素高、艾斯迪禾韋利安等球星，花費已達2.27億鎊。