美職轉會窗開放　FC洛杉磯連斟梅拿孫興民

美職轉會窗於周四(24日)開放，剛出席世冠盃嘅FC洛杉磯積極增兵，據報正力斟德國名將湯馬士梅拿，近日再向熱刺正式報價收購孫興民，準備打造星級戰隊。

FC洛杉磯剛在世冠盃1和2負小組出局，但同組對手係冠軍車路士及巴甲班霸法林明高，就算失利，表現絕對唔失禮，該隊星級射手基奧特剛宣布離隊，但仍有前法國門將洛里斯在陣，如果孫興民加盟，將會與該前熱刺隊友在美國重聚。

湯馬士梅拿今夏與拜仁慕尼黑約滿，但呢位35歲射手仲未掛靴，將轉戰二線聯賽，正與澳職FC悉尼同美職FC洛杉磯接洽，湯馬士梅拿本人傾向轉戰美職，將於未來7至10日決定去向。

FC洛杉磯同時斟介孫興民，並向熱刺提交報價，該位33歲南韓隊長剛協助熱刺贏得歐霸盃冠軍，完成任務，孫興民今夏跟隨熱刺完成亞洲集訓後，就會決定自己去向，洛杉磯共有多達32萬南韓人僑居，孫興民如果加盟，對FC洛杉磯商機無限。