伊沙克投轉會震撼彈　要求離隊被踢出亞洲之旅

英超炙手可熱前鋒阿歷山大伊沙克，日前正式向紐卡素提出轉會要求，呢個消息震撼夏天轉會市場。紐卡素周四(24日)出發新加坡展開亞洲之旅，即以伊沙克「有傷」為由踢佢出名單，連名宿舒利亞都炮轟紐卡素粉飾太平。據報利物浦仍有充足資金實現交易，上周開出嘅1.2億鎊轉會費依然生效！

伊沙克上季勁入27球，被視為英超最佳前鋒之一，利物浦上周開價1.2億鎊收購，雖然被紐卡素一口拒絕，但係伊沙克嘅心已被動搖，繼首場熱身賽對些路迪因「轉會困擾」被遣返後，周四大軍出發去新加坡，球會再宣布伊沙克有「輕微大腿傷患」而未有隨隊出發。

不過，據轉會權威羅曼諾同英國各大媒體爆料，伊沙克喺大軍出發前，正式向紐卡素提出轉會要求，羅曼諾透露：「伊沙克已通知紐卡素希望轉會，球會明白佢嘅個人意願，已開始物色市場上嘅替代人選。」

對於今次鬧劇，紐卡素名將舒利亞炮轟：「紐卡素話伊沙克有輕傷去唔到亞洲，實在太匪夷所思！佢哋覺得球迷唔知道背後真正原因？實在令人好失望。點解唔直接講出發生嘅事？發生咗嘅事就係發生咗，伊沙克想走嘅話阻唔到，我哋要爭取最大回報，1.5億鎊以上轉會費，冇任何人可以大過球會。」

利物浦上周曾開價1.2億鎊收購伊沙克，雖然被拒絕後已斥7,900萬鎊簽入法國前鋒伊基迪基，但羅曼諾同《利物浦回聲報》均報道，只要紐卡素同意放人，「紅軍」仍然打算簽埋伊沙克，上星期嘅開價仍然生效。事實上，喺阿仙奴、車路士都退出爭奪下，利物浦簽伊沙克已經冇乜對手。