【有片】艾雲費格遜首演大四喜 羅馬執到寶
羅馬早前向白禮頓借用前鋒艾雲費格遜，周五(25日)凌晨熱身賽首度亮相，踢咗1個鐘頭左右就食出「大四喜」。如果呢位愛爾蘭前鋒踢番起，羅馬明年有權用3,200萬鎊將佢買斷，真係執到寶！
獲加斯柏連尼執教嘅羅馬，今場採用3-4-2-1陣式，艾雲費格遜擔任箭頭，佢喺24分鐘內就連中三元，60分鐘再入多1球，加上佢助攻保羅戴巴拿入波，個人貢獻5球，羅馬最終9比0大勝丁組球隊Unipomezia。
現年20歲嘅艾雲費格遜，3年前喺白禮頓冒起，一度被標籤為「1億鎊」新星，但之後因傷患困擾陷入低潮，今夏外借羅馬希望重新振作，合約內亦有3,200萬鎊買斷條款。艾雲費格遜表示加盟羅馬其中一個原因，係希望同加斯柏連尼合作，因為加斯柏連尼曾培育出唔少頂級前鋒。